O Comité en Primeira Persoa de Saúde Mental FEAFES Galicia, órgano formado por persoas usuarias que intentamos traballar a favor dos nosos dereitos e contra o estigma asociado ós problemas de saúde mental, convoca o seu Terceiro Concurso Fotográfico baixo o nome, “FAI ZOOM A TÚA SAÚDE MENTAL”.

Coa posta en marcha deste concurso pretendemos, coa modestia e a humildade da proposta, contribuír polo menos, a fomentar a participación e a expresión artística, mostrar  a realidade coa que se atopan as persoas con problemas de saúde mental respecto ao seu acceso ao emprego e á inclusión no mundo laboral, e amosar que, en ocasións, as capacidades e as oportunidades, vense ocultas e sepultadas polo estigma e os estereotipos.

Queremos que nos amosedes, a través das vosas imaxes, a vosa percepción ou experiencias respecto da necesidade de  coidar, mimar e atender cada día ao noso benestar e a nosa saúde mental. Invitámosvos a que abrades o zoom e nos ensinedes os lugares aos que acudides para vos refuxiar, relaxar, meditar e atopar paz. En definitiva, os sitios que vos fan sentir ben para coidar a vosa saúde mental. E que nos contedes coas vosas palabras por que vos motivan e vos axudan.

Neste concurso poderá participar calquera persoa residente na comunidade autónoma de Galicia que estea vencellada á saúde mental ou pertenza a algunha entidade de Saúde Mental FEAFES Galicia: persoas participantes nos servizos ou programas, familiares, persoas achegadas, amizades, persoas voluntarias ou colaboradoras, etc. Cada participante poderá enviar un máximo de dúas fotografías.

O prazo para a recepción das propostas rematará o domingo 14 abril de 2023 ás 23:00 da noite. As fotografías e a documentación requirida deberá ser enviada por correo electrónico a 

comite.primerapersona@feafesgalicia.org

Aquí podedes consultar as bases do III Concurso fotográfico “Fai zoom á túa saúde mental”.